முழுமஹாபாரதத்தின் தொடக்க பர்வமான ஆதிபர்வத்தில், "இரண்டாவதாக வரும் சபா பர்வத்தில் வரும் நிகழ்வுகளாவன: பாண்டவர்கள் நிறுவிய அரசவையும், அவர்களுடன் தொடர்புடையோரின் மதிப்புரைகளும்;(133) தேவலோகங்களை நன்கறிந்தவரான நாரதரின் லோகபாலகர்கள் குறித்த வர்ணனை; ராஜசூய வேள்விக்கான ஆயத்தம்; ஜராசந்த வதம்;(134) மகதத்தின் தலைநகரான கிரிவ்ரஜத்தின் மலையடிவாரத்தில் அடைபட்டுக் கிடந்த இளவரசர்களைக் கிருஷ்ணன் விடுதலை செய்வது; பாண்டவர்களின் உலகளாவிய படையெடுப்புகள்;(135) ராஜசூய வேள்விக்குக் காணிக்கையோடு பிற நாட்டு இளவரசர்களின் வருகை; வேள்வியின் போது அர்க்கியம் அளித்தல் தொடர்பாகச் சிசுபாலன் கொல்லப்படுவது;(136) சபையில் துரியோதனனைப் பீமன் கேலி செய்வது; பெருமளவில் செய்யப்பட்டிருக்கும் ஏற்பாடுகளைக் கண்டு துரியோதனன் அடையும் பொறாமையும், கவலையும்; துரியோதனனின் உளக்கொதிப்பும்,(137) பகடையாட்டத்திற்கான ஆயத்தங்களும்; வஞ்சகன் சகுனியுடனான சூதாட்டத்தில் யுதிஷ்டிரன் தோல்வியுறுவதும்;(138) திருதராஷ்டிரன், புயலின் அலைகளால் கலங்கடிக்கப்பட்ட படகைப் போலச் சூதாட்டத்தால் விளைந்த துன்பக்கடலில் மூழ்கியிருந்த தன் மருமகள் திரௌபதியைத் துன்பத்தில் இருந்து விடுவித்தல்.(139) யுதிஷ்டிரனை மீண்டும் சூதாட வைக்கத் துரியோதனன் செய்த முயற்சி;(140) சூதாட்டத்தில் வீழ்த்தப்பட்ட யுதிஷ்டிரன் தனது தம்பிகளுடன் வனவாசம் புகுதல். பெரும் வியாசரால் தொகுக்கப்பட்ட சபா பர்வம் இந்தச் சம்பவங்களால் ஆனதே.(141) இந்தப் பர்வமானது எழுபத்தி எட்டுப் பகுதிகளாகப் பிரிக்கப்பட்டு, இரண்டாயிரத்தி ஐநூற்றி ஏழு சுலோகங்களுடன் உள்ளன" என்று இருக்கிறது
சபா பர்வம் :
சபா கிரியா, லோகபால சபாகயானம், ராஜசூய ஆரம்பம், ஜராசந்த வதம், திக்விஜயம்,
ராஜசூயீகம், அர்க்கியாஹரணம், சிசுபால வதம், தியூதம், அனுத்யூதம் என்ற பத்து
உபபர்வங்களும், அவற்றில் 80 பகுதிகளும், 2708 ஸ்லோங்களும் இருக்கின்றன
- மஹாபாரதம் தொடர்புடைய மேலும் சில கிண்டில் புத்தகங்களுக்கு:
https://mahabharatham.arasan.info/p/kindle-ebooks.htmlநன்றி
அன்புடன்
செ.அருட்செல்வப்பேரரசன்
201910131823
திருவொற்றியூர்